15 студзеня ў санктуарыі Гродзенскай дыяцэзіі Маці Божай Шкаплернай у Гудагаі (Астравецкі дэканат) прайшла сустрэча моладзі, прысвечаная таямніцы Божага Аб’яўлення і разважанню над пладамі Духа Святога.
Як паведамляе karmel.by, дзяўчаты і юнакі павіншавалі адно аднаго з нагоды святаў Божага Нараджэння і падзяліліся аплаткай.
Затым падчас адарацыі сабраныя праславілі Усемагутнага Бога за дары і ласкі, якія дапамагаюць чалавечай асобе ажыццяўляць хрысціянскае пакліканне.
Айцец Аркадзь Куляха OCD паразважаў з маладымі людзьмі пра шчодрасць дароў Духа Святога, якія дае Пан Бог. Святую Імшу для моладзі ўзначаліў айцец Юрый Находка OCD.
Вечарам сёстры кармэліткі Дзіцяткі Езуса запрасілі дзяўчат і хлопцаў у свой дом, дзе разам з мясцовай катэхеткай Аленай Мечыславаўнай прапанавалі гасцям забавы, конкурсы, віктарыны і салодкі стол.
