16 красавіка, ў нядзелю Божай Міласэрнасці, Апостальскі нунцый у Беларусі арцыбіскуп Антэ Ёзіч наведаў Ліду (Гродзенская дыяцэзія), дзе ўзначаліў адпустовую ўрачыстасць у парафіі Божай Міласэрнасці, што ў новым лідскім мікрараёне Маладзёжны.

Прадстаўнік Папы Францішка ў Беларусі ўпершыню наведаў горад, у якім пражывае адна з найбольшых у нашай краіне каталіцкіх супольнасцяў: католікі складаюць тут больш за палову насельніцтва. Для Лідскага рэгіёна нават прызначаны асобны Біскупскі вікарый — шматгадовы пробашч парафіі Узвышэння святога Крыжа ў Лідзе ксёндз канонік Уладзімір Гуляй, які ад імя біскупа Гродзенскага Аляксандра Кашкевіча каардынуе душпастырскую і адміністрацыйную дзейнасць Касцёла на Лідчыне.

Нунцый Ёзіч прыбыў у Ліду па запрашэнні ксяндза каноніка Андрэя Зноскі, пробашча маладой мясцовай парафіі Божай Міласэрнасці, размешчанай у мікрараёне Маладзёжны, што ў паўночна-заходняй частцы горада.

Прадстаўніка Святога Айца прывіталі ў святыні спевам на яго роднай мове.

Як пазней сказаў сам Антэ Ёзіч, які паходзіць з Харватыі, гэты касцёльны спеў з яго радзімы ў выкананні парафіяльнага моладзевага хору «Спяваючыя сэрцы» пад кіраўніцтвам Веранікі Красцьянінавай «гучаў нават лепш, чым у арыгінале».

Вітаючы высокага госця і прысутнае духавенства ў запоўненай святыні, якая з’яўляецца самым вялікім касцёлам у Лідзе, ксёндз Андрэй Зноска растлумачыў вернікам, хто такі Апостальскі нунцый. Пры гэтым святар звярнуўся да Кодэкса кананічнага права — галоўнага збору касцёльных законаў, у перакладзе якога на беларускую мову ён сам браў актыўны ўдзел як дасведчаны юрыст і кананіст. Гэты пераклад Кодэкса, прэзентаваны напрыканцы мінулага года ў межах адзначэння 30-годдзя з часу ўсталявання дыпламатычных адносін паміж Святым Пасадам і Рэспублікай Беларусь, быў здзейснены па ініцыятыве нунцыя Ёзіча, і ксёндз Андрэй, па словах ватыканскага прадстаўніка, адыграў у яго падрыхтоўцы адну з галоўных роляў.

Хоць парафія ў мікрараёне Маладзёжны, у адрозненні ад тутэйшага касцёла, далёка не самая вялікая ў Лідзе, аднак на адпустовай урачыстасці сабралася больш за паўтысячы чалавек. Усе яны з вялікай радасцю віталі таксама свайго першага пробашча, ксяндза каноніка Станіслава Пацыну з Радуні. Як нагадаў у прывітальным слове ад старэйшага пакалення вернікаў старшыня парафіяльнай Рады Леон Муліца, дзякуючы душпастырскай руплівасці ксяндза Станіслава амаль трыццаць гадоў таму стварылася гэтая парафіяльная супольнасць, і неўзабаве на полі, дзе «калісьці раслі капуста і буракі», супольнымі намаганнямі вернікаў і іх пробашча вырасла цудоўная святыня ў гонар Божай Міласэрнасці.

Менавіта ксёндз Станіслаў Пацына хрысціў некаторых маладых людзей з тых 35-і асоб, якія ў парафіяльную ўрачыстасць прынялі з рук прадстаўніка Папы сакрамэнт хрысціянскай сталасці — канфірмацыю, або бежмаванне.

Звычайна ў Каталіцкім Касцёле гэты сакрамэнт удзяляе толькі біскуп. Як прызнаўся нунцый Ёзіч, ён упершыню меў магчымасць удзяліць яго толькі цяпер, у Лідзе.

Пасля таго, як ксёндз Уладзімір Гуляй прачытаў Евангелле пра тое, як апостал Тамаш, які спачатку не верыў у Змёртвыхпаўстанне Хрыста, стаў веруючым, дакрануўшыся да прабітых рук і боку Уваскрослага, пробачш прадставіў арцыбіскупу Ёзічу кандыдатаў да канфірмацыі. Паміж імі адбыўся дыялог, у якім кандыдаты пацвердзілі сваё жаданне прыняць дары Святога Духа і жыць хрысціянскай верай, даючы сваё сведчанне аб Уваскрослым.

У прамоўленай гаміліі арцыбіскуп Ёзіч перадусім сказаў, што вельмі рады ў нядзелю Божай Міласэрнасці маліцца ў парафіі, якая мае такі тытул.

«Я таксама шчаслівы, таму што ўпершыню прадстаўнік Папы наведвае вашую парафію і цэлебруе святую Імшу за вас, за вашыя сем’і, за хворых і асабліва за тых, хто рыхтаваўся прыняць сем дароў Духа Святога, каб мець магчымасць сведчыць аб сваёй веры ў штодзённым жыцці.

Для мяне таксама гэта першы раз, калі я як біскуп удзяляю канфірмацыю, і я шчаслівы, што гэта адбываецца тут, у Лідзе, у Беларусі, дзе я выконваю сваю дыпламатычную і касцёльную місію», — адзначыў Апостальскі нунцый. Іерарх дадаў, што разам са сваімі сямю дарамі Святы Дух у канфірмацыі сам сыходзіць на тых, хто прымае гэты сакрамэнт, і «прысутнасць Бога ў нас робіць нас шчаслівымі і падштурхоўвае станавіцца дарослымі, даваць сведчанне сваім жыццём. Там, дзе жыве Дух Божы, ужо няма месца граху, падзелам, войнам, але перамагаюць любоў, сяброўства, вера і справядлівасць», — сцвердзіў іерарх.

Ён запрасіў кандыдатаў «будаваць новы свет: свет без войнаў, свет, які прымае ўсіх без адрознення, перш за ўсё свет, які прымае бедных і адкінутых.

Запрашаю вас любіць сваю парафію ў Лідзе і наш Каталіцкі Касцёл у Беларусі, умацоўваючы яго сваімі малітвамі і добрымі справамі», — заахвоціў прадстаўнік Папы, завяршыўшы гамілію кароткім зваротам да Маці Божай: «Каралева Беларусі, маліся за нас».

На заканчэнне ўрачыстасці адбылася вялікая нечаканасць: прадстаўнік парафіяльнай Рады Віталій Баркоўскі зачытаў і ўручыў Апостальскаму нунцыю ліст, у якім вернікі парафіі запрасілі Святога Айца Папу Францішка наведаць Беларусь і іх супольнасць. «Дакладна ўсведамляем, які далёкі і складаны шлях з Ватыкана ў Беларусь: і гэта не пра рэкі і горы, якія трэба пераадолець, але пра межы, якія дзеляць чалавечыя сэрцы. <…> Мы не палітыкі, не ўплывовыя асобы — мы простыя людзі, якія ад продкаў атрымалі скарб веры, а разам з ім і вернасць Наступніку Святога Пятра; трываць у ёй — наш гонар.

Быць можа, Божаму Провіду не хапала толькі гэтага нясмелага запрашэння ад звычайных людзей, каб ногі Вашай Святасці маглі ступіць на зямлю нашай любай Беларусі», — было сказана ў звароце, які нунцый Ёзіч паабяцаў абавязкова перадаць Папу Францішку.

На заканчэнне ўрачыстасці яе ўдзельнікаў чакаў яшчэ адзін прыемны сюрпрыз: пасля таго, як нунцый удзяліў прысутным Апостальскае благаслаўленне, у касцёл завітаў біскуп Гродзенскі Аляксандр Кашкевіч, які, вяртаючыся з урачыстасці ў Воранаве, па дарозе не мінуў і парафію Божай Міласэрнасці ў Лідзе.

Пастыра дыяцэзіі з энтузіязмам прывіталі вернікі і запрасілі яго на супольны здымак.

Паводле Catholic.by

Фота: Антон Насовіч

14-15 кастрычніка ў санктуарыі Гродзенскай дыяцэзіі Маці Божай Суцяшальніцы засмучаных у Барунах (Ашмянскі дэканат) прайшлі юбілейныя ўрачыстасці з нагоды 100-годдзя з часу вяртання сюды цудадзейнага абраза Багародзіцы.

Духоўная падрыхтоўка да ўрачыстасцяў пачалася яшчэ ў жніўні. Вернікі ўсіх дэканатаў дыяцэзіі пілігрымавалі да славутага ласкамі абраза, удзельнічалі ў Імшы і мелі магчымасць індывідуальнай малітвы ў санктуарыі, маглі пазнаёміцца з багатай гісторыяй абраза і святыні.

Больш за 330 гадоў вернікі узносяць малітвы і падзякі перад невялікай выявай Маці Божай, вядомай пад тытулам Суцяшальніцы засмучаных. Як даўней, так і сёння па шчырых малітвах Панна Марыя выслухоўвае сваіх дзяцей і дапамагае ім у розных патрэбах. Некалькі разоў абраз пакідаў святыню і Баруны, але Маці Божая заўсёды вярталася ў гэтае месца, якое выбрала сама. Апошняе вяртанне абраза ў Баруны было 100 гадоў таму, 15 кастрычніка 1922 г.

Галоўная цэлебрацыя ў межах урачыстасцяў пачалася 15 кастрычніка апоўдні. На святкаванні сабралося шмат пілігрымаў.

Усіх прысутных прывітаў біскуп Гродзенскі Аляксандр Кашкевіч. Іерарх заахвоціў усіх падзякаваць Богу праз цэлебрацыю Найсвяцейшай Ахвяры за цудоўную спадчыну веры i за нашу багатую гісторыю.

“Хочам сёння дзякаваць за дар суцяшэння ў розных пакутах, якія перажывалі незлічоныя пакаленні вернікаў, што прасілі заступніцтва Марыі”, – дадаў пастыр Касцёла на Гродзеншчыне.

Іерарх прывітаў арцыбіскупа эмерыта Тадэвуша Кандрусевіча, біскупа Віцебскага Алега Буткевіча, дапаможнага біскупа Мінска-Магілёўскай архідыяцэзіі Аляксандра Яшэўскага SDB, Апостальскага візітатара для беларускіх грэка-католікаў архімандрыта Сяргея Гаека, шматлікіх гасцей і пілігрымаў з розных куткоў Беларусі і з-за мяжы.

Перад літургіяй адбылося благаслаўленне новага звона-сігнатуркі, у які б'юць на пачатак Імшы і іншых набажэнстваў, фундаванага з нагоды 100-годдзя вяртання абраза. Благаслаўленне здзейсніў біскуп Аляксандр Яшэўскі.

Эўхарыстыю ўзначаліў біскуп Алег Буткевіч, старшыня Канферэнцыі Каталіцкіх Біскупаў у Беларусі. Гамілію прамовіў арцыбіскуп Тадэвуш Кандрусевіч.

Арцыбіскуп нагадаў гісторыю прыбыцця цудадзейнага абраза ў Баруны. Ён падкрэсліў, што назва “Баруны” паходзіць ад слова “бор”, хваёвы лес; такі лес вельмі добры для лячэння ад хваробаў лёгкіх, таму ў ім будуюць санаторыі. А Баруны, як дадаў іерарх, больш за тры стагоддзі таму сталі духоўным санаторыем, у якім праз заступніцтва Суцяшальніцы засмучаных людзі атрымліваюць шчодрыя ласкі.

Таксама арцыбіскуп дадаў, што пасля забароны царскай уладай манаскіх ордэнаў базыліянскі кляштар у Барунах быў ліквідаваны, цудадзейны абраз вывезлі, а ў 1922 г. ён трыўмфальна вярнуўся. Па словах іерарха, Божая Маці сцерагла гэтае месца ў часы ганенняў на веру: у наваколлі ўсе касцёлы былі зачыненыя, а барунскі дзейнічаў і ў ім быў святар.

Іерарх адзначыў, што тры дзесяцігоддзі таму пачалося адраджэнне барунскага санктуарыя, ён становіцца ўсё больш вядомым з пункту гледжання яго гісторыі і культу Маці Божай. “На Яе людзі ўскладаюць надзею ў сённяшні складаны час з яго маральнымі і грамадскімі паталогіямі. Мы не можам быць абыякавымі да іх, бо гэта будзе здрадай Богу і хрысціянству. Мы адказныя за наш лёс і лёс сучаснага свету. Хто дапаможа? Да каго звяртацца? У кім надзея? Касцёл указвае на Марыю, мы павінны браць прыклад з Яе, бо згода з Божай воляй – ключ да будавання шчаслівага жыцця на зямлі і дасягнення вечнага шчасця ў небе”, – сказаў арцыбіскуп.

Пры гэтым, па яго словах, трэба памятаць, што “толькі прачытаная праўда аб збаўленні нас не збавіць, неабходна ёю жыць; адкідванне Бога вядзе да жыцця без маральных нормаў”. Іерарх падкрэсліў, што жывую ваду Божай ласкі чалавек атрымлівае ў сакрамэнтах.

Арцыбіскуп звярнуўся да Маці Божай Барунскай у малітве, просячы ў сённяшні складаны час быць прытулкам і надзеяй, дапамагаць людзям ствараць у сваіх сэрцах Яе вобраз праз пакаянне і справы міласэрнасці, дапамагаць вызваліцца ад граху і залежнасцяў і заўсёды выбіраць Бога.

На заканчэнне святкаванняў пробашч барунскай парафіі і кусташ санктуарыя кс. Павел Паўлюкевіч падзякаваў прысутным за шматлікі ўдзел і запрасіў прыязджаць сюды да Маці Божай, якая, па яго словах, заўсёды суцешыць і дасць надзею, патрэбную, каб ісці шляхамі жыцця.

Прэс-служба Гродзенскай дыяцэзіі

Фота: Віктар Ведзень

З 7 па 9 ліпеня ў санктуарыі Гродзенскай дыяцэзіі Маці Божай Каралевы нашых сем’яў адбудзецца традыцыйны фэст.

Дэвіз урачыстасцяў – “Марыя, аб’яднай нашы сэрцы і сем’і!”.

Праграма:

7 ліпеня

10.00 – спеў да Маці Божай Тракельскай, Ларэтанская літанія з удзелам кола Жывога Ружанца Гродзенскай дыяцэзіі

10.30 – адарацыя Найсвяцейшага Сакрамэнту

11.15 – канферэнцыя

12.00 – Крыжовы шлях

13.00 – святая Імша

15.00 – Вяночак да Божай Міласэрнасці

15.30 – праца творчых пляцовак у Марыйным садзе

17.30 – прывітанне пілігрымаў

18.00 – святая Імша для пілігрымаў

20.00 – Ружанец (частка Радасная)

21.00 – канферэнцыя “Марыя, аб’яднай нашы сэрцы і сем’і”

21.45 – Марыйны заклік

23.00 – урачыстая працэсія са свечкамі, святая Імша пастэрка

8 ліпеня

07.00 – Гадзінкі да Маці Божай, Марыйныя песні

08.00 – Ружанец (частка Святла)

09.00 – святая Імша з удзелам святароў-юбіляраў і сясцёр законных

11.00 – аднаўленне сужэнскіх абяцанняў

12.45 – падрыхтоўка да святой Імшы

13.00 – урачыстая святая Імша

17.00 – адарацыя Найсвяцейшага Сакрамэнту “Марыя, адары мяне дарам мацярынства”

19.00 – святая Імша

21.00 – сустрэча пры вогнішчы, прагляд фільма

9 ліпеня

08.00 – Ружанец (частка Балесная)

10.00 – святая Імша “за добрага мужа ці жонку”

11.00 – канцэрт

12.00 – Ружанец (частка Хвалебная)

13.00 – святая Імша падзякі за ласкі гэтых урачыстасцяў, благаслаўленне