На днях Лідскі райвыканкам перадаў на дармовай аснове парафіі Адведзінаў Найсвяцейшай Панны Марыі ў Тракелях (Радунскі дэканат) капліцу ў вёсцы Двoрышча.
Капліца была пабудавана ў 90-я гады. Аднак узведзены былі толькі сцены, унутраная адробка не вялася. У такім стане яна захавалася да сённяшняга дня.
Плануецца, што ў найбліжэйшы час у капліцы распачнецца рамонт, і яна будзе служыць вернікам як месца малітвы.
“Хочам удыхнуць у капліцу жыццё, праводзіць тут набажэнствы, збірацца на каталіцкія святы і ўрачыстасці”, – aдзначыў у размове з grodnensis.by пробашч парафіі кс. доктар Юрый Бяганскі. Святар упэўнены, што з Божай дапамогай атрымаецца рэалізаваць усе існуючыя планы.
Калі святыня будзе цалкам адрэстаўравана, яе плануецца асвяціць пад тытулам Маці Божай Ружанцовай. Гэты тытул невыпадковы, бо пад ім у гэтых мясцінах раней ужо былі каталіцкія святыні.
Ёсць гістарычныя звесткі, што першая капліца ў гонар Маці Божай Ружанцовай была пабудавана ў вёсцы Дворышча ў 1591 годзе рэктарам Віленскай акадэміі Гарцыя Алабіяна.
У 1770 годзе пасля зруйнавання старой была пабудавана езуітамі новая капліца, а ў 1860 годзе арандатар і будучы ўладальнік Дворышча Аляксандр Вольскі пабудаваў на тым жа месцы васьмівугольную капліцу.
На месцы колішняй капліцы Маці Божай Ружанцовай сёння ўсталявана фігурка Найсвяцейшага Сэрца Езуса. Ля фігуры штогод спыняюцца з малітвай сотні пілігрымаў, якія ідуць з боку Ліды ўшанаваць цудатворны абраз Маці Божай Тракельскай. Паміж сабой вернікі нават празвалі гэтае месца “Гарой прабачэння”.
Кс. Юрый Марціновіч
