У Шчучыне завяршыліся Дыяцэзіяльныя дні моладзі (+відэа)

8 мая святой Імшой у парафіі Св. Тэрэзы Авільскай у Шчучыне завяршыліся Дыяцэзіяльныя дні моладзі. Гэта быў ужо 26-ы форум маладых людзей Касцёла на Гродзеншчыне.

Імшу, падчас якой удзельнікі дзякавалі Богу за цудоўны дар маладосці, за скарб веры, які атрымалі ў дар ад папярэдніх пакаленняў, за ласку святога хросту, якая ўключыла iх раз і назаўсёды ў супольнасць Хрыстовага Касцёла, узначаліў біскуп Гродзенскі Аляксандр Кашкевіч.

У гаміліі біскуп узгадаў пра дэвіз сёлетняй сустрэчы і адзначыў, што Найсвяцейшая Панна Марыя ўсім сваім жыццём служыла і пакінула ўсім пакаленням вернікаў гэты прыгожы прыклад служэння.

Па словах іерарха, са смуткам трэба прызнаць, што сучасны чалавек не любіць слова “служыць”. “Сучасны чалавек не хоча нікому служыць: ні іншым людзям, ні Пану Богу. Як калісьці на досвітку гісторыі адзін з анёлаў узбунтаваўся супраць Бога і сказаў: “Не буду служыць!” – так часта чалавек у сваёй пысе і асляпленні адварочваецца ад Бога і не хоча спаўняць Яго волі”, – дадаў пастыр Касцёла на Гродзеншчыне.

Ён падкрэсліў, што Бог “жадае нашага сапраўднага шчасця больш, чым жадаем яго мы самі, і калі нам штосьці забараняе ці чагосьці не дазваляе, то робіць гэта толькі таму, што нас любіць і ведае, што не ўсё служыць нашаму праўдзіваму дабру”. Біскуп дадаў, што сумнае жыццё чалавека, які забываецца пра айцоўскую любоў Бога, гэтай любові не давярае або пагарджае ёю. Такі чалавек ніколі не будзе шчаслівы.

Іерарх заахвоціў моладзь Касцёла на Гродзеншчыне ўсвядоміць, што кожнага з нас Пан Бог адорвае якімсьці асаблівым пакліканнем, адкрывае перад намі адзіны і непаўторны, наш уласны шлях.

“Мы ўсе, незалежна ад нашага асабістага жыццёвага шляху, пакліканы дзяліцца верай, даваць пра яе сведчанне, быць сапраўднымі вызнаўцамі і сведкамі Хрыста Уваскрослага. Наша сведчанне праХрыста – словам і ўчынкам – гэта таксама служэнне Богу і іншаму чалавеку”, – сказаў біскуп.

На заканчэнне Эўхарыстыі былі выказаны падзякі ўсім, хто паспрыяў арганізацыі гэтага свята, якое з’яднала столькі маладых людзей у адной мэце – каб супольна славіць Пана.

Падзяка была адрасавана і самой моладзі, якая, нягледзячы часам не вялікую адлегласць, прыбыла ў Гродна, каб засведчыць сваю прыналежнасць да Хрыстовага Касцёла і паказаць, што хоча і далей жыць з Богам i па прыкладу Марыі служыць.

Няхай гэты форум моладзі Гродзенскай дыяцэзіі прынясе благаслаўлёны плён – такім было і застаецца жаданне арганізатараў.

Дні моладзі Гродзенскай дыяцэзіі сёлета праходзілі ў Шчучыне з 6 па 8 мая. Іх дэвізaм былі абраны словы: “Па прыкладу Марыі буду служыць Пану”. Гэтыя словы працягвалі тэму Сусветных дзён моладзі, якія ў студзені прайшлі ў Панаме пад дэвізам “Вось я, слуга Пана, няхай мне станецца паводле твайго слова” (Лк 1, 38).

У сустрэчы ўдзельнічалі больш за 1000 чалавек з розных парафій Гродзеншчыны, а таксама прадстаўнікі Мінска-Магілёўскай архідыяцэзіі. Маладым людзям спадарожнічaлі іх душпастыры, сёстры законныя і катэхеты.

Кс. Юрый Марціновіч

Фота: Вольга Cяліцкая