Kаталіцкі Касцёл у справе евангелізацыі не можа забываць пра найбяднейшых. Па-першае, таму, што такая логіка Евангелля, а па-другое – як падкрэслівае Папа Францішак, – бо толькі тады Касцёл будзе праўдзівым. Таму ўсе супольнасці вернікаў ва ўсім свеце заахвочваюцца станавіцца ўсё больш выразным і канкрэтным знакам любові Хрыста да апошніх у свеце і найбольш патрабуючых.
Мы “даўжнікі” бедных
У сувязі з гэтым Папам Францішак устанавіў на заканчэнне Надзвычайнага Юбілею Міласэрнасці Сусветны дзень бедных. Ён адзначаецца ў Касцёле кожную ХХХІІІ Звычайную нядзелю літургічнага года.
У сёлетнім пасланні на Сусветны дзень бедных Пантыфік заклікаў усіх адчуць сябе “даўжнікамі” бедных, бо калі “працягваем рукі адзін да аднаго, адбываецца збаўчая сустрэча, якая падтрымлівае веру, робіць дзейснай любоў і запальвае надзею, каб з упэўненасцю працягваць крочыць па шляху да Пана, Які прыходзіць”.
Менавіта такое працягванне рук патрабуючым здзейсніў біскуп Гродзенскі Аляксандр Кашкевіч, наведаўшы 20 лістапада жыхароў Дома начнога прабывання для асобаў без пэўнага месца жыхарства ў Гродне. Іерарх прыбыў разам з дырэктарам Рэлігійнай місіі “Дабрачыннае каталіцкае таварыства “Карытас”” Гродзенскай дыяцэзіі кс. д-рам Раманам Рачко. Дабрачынная арганізацыя перадала ў гэты дзень падарункі для людзей, якія не маюць даху над галавой і вымушаны пражываць у гэтым доме.
Вера перамагае праблемы
Падчас сустрэчы з жыхарамі гэтага дома іерарх запэўніў, што Каталіцкі Касцёл стараецца выходзіць па меры сваіх магчымасцяў на сустрэчу з усімі патрабуючымі. Ён пажадаў, каб вера і надзея ў іх сэрцах ніколі не згасала. “Дзякуючы веры мы здольныя перамагаць усялякія цяжкасці і праблемы”, – дадаў біскуп.
Ксёндз Раман Рачко нагадаў, што “Карытас” Гродзенскай дыяцэзіі заўсёды адкрыты на патрэбы бедных. Доказам гэтай адкрытасці з’яўляецца сталоўка пры гродзенскім кляштары сясцёр назарэтанак побач з Галоўным паштамтам, дзе цёплы пасілак рыхтуе дабрачыннае таварыства. У “Карытас” можна таксама атрымаць вопратку.
Біскуп Кашкевіч падзякаваў кіраўніцтву гэтага дома ў асобе Яўгена Ярмантовіча за штодзённы клопат аб людзях, якім патрэбна падтрымка. Іерарх адзначыў, што гэта вялікі ўклад у чалавека, які не мае ўласнага даху над галавой. Дом начнога прабывання для асобаў без пэўнага месца жыхарства ў Гродне з’яўляецца менавіта такой заменай свайго дома для іх. Персанал з 10 чалавек стараецца стварыць тут адпаведныя ўмовы, каб кожны жыхар мог адчуваць сябе як мага лепш.
Святы Айцец у сёлетнім пасланні адзначае таксама, што той, “хто пачынае служыць, становіцца прыладай у руках Бога, каб заззяла Яго прысутнасць і Яго збаўленне”. Няхай жа служэнне Касцёла і дзяржавы бедным адказвае на крык тых, хто ў патрэбе, які штодня становіцца ўсё больш і больш моцным. Няхай яго не заглушае гоман багацеяў, якія становяцца ўсё багацейшымі.
Даведка:
Дом начнога прабывання для асобаў без пэўнага месца жыхарства ў Гродне па вул. Карскага быў заснаваны ў 2008 г. Тут могуць знайсці свой “дом” каля 50 чалавек. У дадзены момант гэтая “сям’я” складаецца з 30 чалавек, пераважна мужчын, ва ўзросце ад 30 да 60 гадоў. Гарадскія ўлады стварылі для гэтых людзей усе неабходныя жыллёва-бытавыя ўмовы для штодзённыя жыцця.
На першым паверсе размясціліся падсобныя памяшканні, санітарны прапускнік, ізалятар, пакой прыёму ежы, душавыя кабіны. На другім паверсе – пакоі для пражывання. Жыць тут можна ад месяца да года, хаця ў некаторых выпадках дамова можа прадаўжацца.
Для бяспекі жыхароў арганізаваны відэанагляд, у кожным пакоі – гучнагаворачыя абсталяванні, ля галоўнага ўваходу дзяжурыць ахоўнік. Пры ўваходзе ў дом кожнага жыхара чакае праверка алкатэстам. Для забруджанай вопраткі існуе спецыяльная дэзінфекцыйная шафа.
Дырэкцыя дома начнога прабывання праводзіць раз у месяц з кожным паасобку і з усімі разам рэгулярныя размовы.
Кс. Юрый Марціновіч
