16 чэрвеня біскуп Гродзенскі Аляксандр Кашкевіч наведаў парафію Унебаўзяцця Найсвяцейшай Панны Марыі ў Дзятлаве.
На святой Імшы ў парафіяльным касцёле іерарх удзяліў сакрамэнт канфірмацыі вернікам, адпаведным чынам падрыхтаваным да гэтага.
У гаміліі кс. канонік Віталій Вайцяхоўскі, рэктар Вышэйшай духоўнай семінарыі ў Гродне, падкрэсліў значэнне гэтага сакрамэнту і патлумачыў, да чаго ён абавязвае чалавека.
У канцы Эўхарыстыі біскуп заклікаў канфірмаваных узрастаць у веры і імкнуцца быць яе сапраўднымі сведкамі там, дзе яны вучацца і працуюць.
Пробашч парафіі кс. Андрэй Лішко падзякаваў іерарху за візіт і ўдзяленне сакрамэнту хрысціянскай сталасці. Сваіх парафіян святар заахвоціў працягваць супрацоўнічаць з ласкай Пана Бога.
Прэс-служба Гродзенскай дыяцэзіі
