У хуткім часе з’явіцца новая тэлеперадача “Сімвал веры”. Новы выпуск будзе рэхам мінулых святаў Божага Нараджэння ў Гродзенскай дыяцэзіі.
Аўтары праграмы найперш жадаюць перадаць атмасферу святочных канцэртаў калядных і пастаральных песень, што адбыліся ў Іўі і Сапоцкіне.
Арганізатары гэтых канцэртаў распавядуць пра пачатак узнікнення гэтага прыгожага звычаю, калі ў дамах культуры сустракаюцца сотні вернікаў, каб разам спяваць калядкі і пастаралкі. Удзельнікі ў сваю чаргу падзеляцца перажываннямі і тым, чым для іх з’яўляецца спеў.
Новы выпуск тэлеперадачы можна будзе ўбачыць 7 лютага ў 19.45, паўтор – 8 лютага ў 9.00, на тэлеканале “Беларусь–4”.
Тыя, хто не будзе мець магчымасці паглядзець перадачу па тэлебачанні, змогуць убачыць яе на нашай інтэрнэт-старонцы.
Тэлеперадача “Сімвал веры” – гэта найперш паказ рэлігійнага жыцця ў Гродзенскай дыяцэзіі. Яна выходзіць пры супрацоўніцтве Каталіцкай тэлестудыі Гродзенскай дыяцэзіі і дзяржаўнага тэлебачання.
JM
