Рух “Сужанскія сустрэчы" праводзіць рэкалекцыі па аднаўленню і паглыбленню сужанскай еднасці і любові. Бліжэйшая сустрэча будзе праходзіць з 25 па 27 лістапада ў цэнтры "Карытас" у вёсцы Ляскоўка каля Бараўлян (Мінскі раён). Рэкалекцыі пачынаюцца ў пятніцу ў 18.00, а заканчваюцца ў нядзелю каля 15.00. Арганізатары забяспечваюць начлег і пасілак. Неабходны ўдзел абодвух сужанцаў, без дзяцей і ва ўсёй праграме.
"Сужанскія сустрэчы" - гэта рэкалекцыйны рух, мэтай якога з'яўляецца паглыбленне шлюбных адносінаў, дапамагчы мужу і жонцы лепш разумець адзін аднаго і асэнсаваць таямніцу іх шлюбу. Сужанствам прапануецца такая форма дыялогу, якая, з аднаго боку, дазваляе мужу і жонцы глыбей пазнаць адзін аднаго, а з другога - у выпадку непаразуменняў - дапаможа выходзіць з канфліктных сітуацый.
Каб сутрэцца адзін з адным і з Богам, трэба больш слухаць, чым казаць, больш дзяліцца, чым спрачацца, больш разумець, чым ацэньваць, а ў першую чаргу - прабачаць.
Сужанскія пары і святары – аніматары руху, праз уласный досвед рыхтуюць удзельнікаў да самастойнай працы, гэта значыць да правядзення дыялогу. Гэтую працу муж і жонка праводзяць выключна ўдваіх. Уласная праца ўдзельнiкаў з’яўляецца вельмi iнтымнай i таму абавязкова застаецца таямнiцай.
Сямейная пара можа за час правядзення рэкалекцый аднавіць свежасць узаемных пачуццяў, абнавіць ці нанова адбудаваць сваё адзінства. Сужанцы пасля ўікэнда звычайна ў стане лепш вырашаць свае праблемы. Праграма складзена такім чынам, што дазваляе кожнай пары паглядзець на сваё жыццё ў духу любові, і заснавана на сучасных ведах з вобласці псіхалогіі, камунікацыі і тэалогіі сям’i.
На "Сужанскія сустрэчы" прыходзяць людзі ў розным узросце, з розным досведам сямейнага жыцця, з розным узроўнем ведаў і рознай ступенню пабожнасці, з розным узроўнем перажывання пачуццяў, якія злучаюць ці падзяляюць сужэнцаў. На ўікэнд могуць прыехаць як так званыя умоўна "добрыя мужы і жонкі", так і тыя, якія маюць сур'ёзныя канфлікты, можа нават на этапе думак пра развод. Ва ўікэндзе прымалі таксама ўдзел шматлікія сужанскія пары, якія жадалі вярнуцца адзін да аднаго пасля развода. Мы адкрытыя на кожную пару, якая імкнецца, каб іх сумеснае жыццё пастаянна развівалася. Мы не ставім удзельнікам фармальных абмежаванняў – на рэкалекцыі могуць прыехаць праваслаўныя і змешаныя сужанствы, напрыклад, каталіцка-праваслаўныя, пары, якія толькі распісаліся ў ЗАГСе і яшчэ не вянчаліся, сужанствы ў паўторным шлюбе.
Кантактныя нумары для запісу на рэкалекцыі: Іван і Алена Лубінскія +375 29 5562635, +375 29 1408456, +375 29 7821466 e-mail: sustre4y@tut.by Сайт: http://suvstrechi.by/
