12 красавіка ў касцёле св. Арханёла Міхала ў Навагрудку адбудзецца ўрачыстае адкрыццё капліцы адарацыі Найсвяцейшага Сакрамэнту. Гэта ўжо другая крыпта, адкрытая ў гэтым касцёле.
Пачатак у 19.00.
Узначаліць урачыстасць біскуп Гродзенскі Уладзімір Гуляй.
У пачатку ўрачыстасці адбудзецца ўнясенне ў касцёл і благаслаўленне абразоў святых Пятра і Паўла, падораных навагрудскай святыні адным з вядомых мастакоў.
У мерапрыемстве возьмуць удзел таксама прадстаўнікі свету культуры і мастацтва.
У хрысціянскай традыцыі першыя малітоўныя сустрэчы, якія праходзілі ў катакомбах-пахавальнях, мелі выгляд сходаў, дзе вернікі часта здзяйснялі праламленне хлеба на магілах мучанікаў у памяць пра Апошнюю Вячэру Езуса. Нягледзячы на тое, што пасля Міланскага эдыкту становішча хрысціян кардынальна змянілася і яны змаглі маліцца ў базыліках, традыцыя звяртацца да Бога ў ціхіх патаемных месцах захавалася.
Крыпты – падземныя капліцы – можна сустрэць у многіх святынях па ўсім свеце. Традыцыйна яны служылі таксама месцамі спачыну мецэнатаў і духавенства.
Капліцы, старанна схаваныя ад чужых вачэй, часам можна знайсці ў каралеўскіх палацах або замках.
Неабходнасць такіх капліц абумоўлена самым сэнсам сустрэчы чалавека з Богам, якая патрабуе патаемнасці і самотнасці, падобна да начных малітваў Езуса.
Аддаляючыся ад мітусні зямнога свету ў пошуках супакою, чалавек можа адкрыць для сябе нябачны Божы свет, які пачынае напаўняць, натхняць і накіроўваць душу, ствараючы магчымасць духоўнага шляху, які нельга асэнсаваць у штодзённых справах. Для многіх гэты шлях дзіўным чынам становіцца відавочным у момант ізаляванасці ад навакольнага свету ў духоўнай прасторы капліцы-крыпты.
