16 красавіка, у Вялікую суботу, з 9 да 16 гадзін на пляцоўцы ля касцёла Найсвяцейшай Панны Марыі Вастрабрамскай у Гродне (вул. Рэпіна) адбудзецца дабрачынны велікодны кірмаш у падтрымку хворых на анкалогію пацыентаў хоспісаў. На кірмаш запрашаюцца ўсе жадаючыя.

“Дабрачынны велікодны кірмаш – гэта падзея, якую немагчыма прапускаць, – адзначаюць арганізатары. – Толькі ўявіце, як ярка запомніцца вам і вашым дзецям паход у касцёл для благаслаўлення велікодных страваў!

Бо кожны чалавек – і дарослы, і зусім маленькі – з вялікім хваляваннем ставіцца да падрыхтоўкі і ўпрыгожвання велікоднага кошыка і паходу ў касцёл у Вялікую суботу. Калі пры гэтым паўдзельнічаць у атмасферным велікодным дабрачынным кірмашы, то цудоўны ўспамін пра сёлетняе свята Вялікадня назаўсёды будзе з вамі. А ўчыненая пры гэтым добрая справа будзе служыць невылечна хворым на анкалогію дарослым, падапечным Цэнтра Дапамогі Жыццю.

Велікодныя цацкі, упрыгажэнні і пернікі неверагоднай прыгажосці клапатліва і з велізарнай любоўю выраблены самымі таленавітымі майстрамі нашага горада і перададзены, каб у кожнага была магчымасць падтрымаць невылечна хворых пацыентаў хоспісаў, бо ўсе сабраныя ў межах кірмашу ахвяраванні будуць выкарыстаны ў падтрымку дзейнасці Цэнтра Дапамогі Жыццю”.