9 мая юбілей 80-годдзя адзначыць кс. Юзаф Занеўскі SDB. У гэты дзень у парафіяльным касцёле святых апосталаў Пятра і Паўла ў Жупранах (Ашмянскі дэканат) адбудзецца святая Імша падзякі за гады жыцця і служэння салезіяніна.
Пачатак Імшы ў 14.00.
Супольнасць салезіянаў Беларусі запрашае да ўдзелу ўсіх вернікаў, а асабліва моладзь і былых выхаванцаў ксяндза Юзафа, яго духоўных сыноў і дачок, каб разам дзякаваць Пану Богу за дар жыцця і святарскага служэння юбіляра.
Ксёндз Юзаф Занеўскі нарадзіўся ў вёсцы Заневічы каля Гродна. У вялікай сям’і, дзе было пяць сыноў і тры дачкі, будучы святар быў самым малодшым.
Прэзбітэрскае пасвячэнне атрымаў у таямніцы ў Польшчы ў 1978 годзе. Ксёндз Занеўскі быў першым салезіянінам, які прыехаў у Беларусь, каб аднаўляць веру і несці Божае слова ў краіну, змучаную атэізмам.
Служыў у Гродзенскай дыяцэзіі ў Гродне, Гервятах, Жупранах, а ў 1991 годзе na запрашэнні арцыбіскупа Тадэвуша Кандрусевіча пераехаў у Расію, дзе больш за 25 гадоў быў пробашчам маскоўскай парафіі Беззаганнага Зачацця Найсвяцейшай Панны Марыі. Таму некаторыя называюць яго “апосталам Масквы”.
