У сувязі з 150-годдзем Кангрэгацыі Сясцёр Найсвяцейшай Сям’і з Назарэта папа Францішак удзяліў асаблівую ласку юбілейнага адпусту на ўвесь год. Святкаванне гэтага юбілею ўпісваецца ў Святы 2025 год, які хутка будзе адзначацца ў Паўсюдным Касцёле.
Юбілейны адпуст
Апостальская Пэнітэнцыярыя на моцы нададзеных ёй паўнамоцтваў папам Францішкам з нагоды святкавання юбілею заснавання Кангрэгацыі Сясцёр Найсвяцейшай Сям’і з Назарэта ласкава надала вернікам магчымасць атрымання поўнага адпусту (індульгенцыю) на звычайных умовах (споведзь, Камунія і малітва ў інтэнцыях Святога Айца). Для яго атрымання неабходна выканаць адзін з наступных крытэрыяў:
1) прачытаць малітву да святой Сям’і;
2) наведаць юбілейныя касцёлы (Звеставання Найсвяцейшай Панны Марыі ў Гродне, Перамянення Пана ў Навагрудку), манаскія капліцы, адгаворваючы індывідуальную або супольную форму малітвы;
3) прыняць удзел у арганізаваных сёстрамі назарэтанкамі юбілейных малітвах і літургічных цэлебрацыях, якія адбываюцца па-за святынямі (напрыклад, у парафіяльным касцёле) ці ў юбілейнай пілігрымцы.
Пажылыя, хворыя і тыя, хто за імі даглядае, а таксама ўсе, хто па сур’ёзных прычынах не ў стане выйсці з дому, могуць атрымаць поўны адпуст, маючы агіду да кожнага граху з намерам выправіцца як мага хутчэй. Неабходна выканаць тры звычайныя ўмовы, духоўна далучыцца да юбілейных цэлебрацый і малітваў, ахвяруючы міласэрнаму Богу свой боль ці нязручнасці жыцця.
Юбілейны адпуст вернікі могуць атрымаць з 1 снежня 2024 года па 30 лістапада 2025 года.
Кангрэгацыя Найсвяцейшай Сям’і з Назарэта
Назарэтанкі – гэта жаночая манаская кангрэгацыя, заснаваная ў Рыме (Італія) у 1875 годзе манахіняй з Польшчы бл. Францішкай Сядліскай. 1 верасня 1896 года папа Леў XIII зацвердзіў канстытуцыю Кангрэгацыі.
У 1908 годзе сёстры назарэтанкі распачалі сваё служэнне ў Гродне, тым самым даўшы пачатак гісторыі Кангрэгацыі на тэрыторыі сучаснай Беларусі. 1 жніўня 1943 года духоўныя дочкі бл. Францішкі Сядліскай – 11 манахінь на чале з настаяцельніцай Марыяй Стэлай – былі расстраляныя гітлераўцамі ў Батароўскім лесе пад Навагрудкам. Яны ахвяравалі сваё жыццё за сем’і і святара, разам з якімі працавалі і маліліся. У 2000 годзе адбылася беатыфікацыя навагрудскіх мучаніц, якую здзейсніў папа Ян Павел ІІ.
“Калі я думаю пра гэты цуд міласэрнасці Божае, што наш малы Назарэт, апошні ў Касцёле Божым, Пан Бог абраў для такой справы, што захацеў даручыць нам такую важную справу ў сваім Валадарстве, што даў нам гэта і паклікаў для гэтага Кангрэгацыю, я не ў стане апісаць, якую ўдзячнасць і замілаванне адчуваю да гэтага Пана Любові. Ён мае тысячы душ куды лепшых, больш здольных, больш дасканалых і ўпэўненых у Яго любові. Але выбраў нас, найбяднейшых, найслабейшых, найменшых, каб паказаць сілу і магутнасць Сваёй любові”.
Сёння сёстры назарэтанкі нясуць паслугу таксама ў іншых краінах свету: Італіі, Польшчы, Францыі, Іспаніі, Англіі, Ізраілі, ЗША, Філіпінах, Аўстраліі, Украіне, Казахстане, Расіі і Афрыцы. Асноўная іх дзейнасць – служэнне сям’і праз катэхізацыю, арганізацыя малітоўных сустрэч і рэкалекцый для сем’яў, служэнне ў прытулках для сірот, доме для адзінокіх маці, бальніцах, школах, дзіцячых садках, правядзенне фармацыйных сустрэч для моладзі. Дэвіз кангрэгацыі – “Хай будзе воля Твая”.
“Мы молім Бога, які 150 гадоў таму паклікаў бл. Марыю ад Пана Езуса Добрага Пастыра, Францішку Седліскую, да заснавання супольнасці сясцёр, каб яны пашыралі Яго Валадарства паміж сабою і сярод іншых, асабліва ў сем’ях, каб Яго бласлаўленне вяло нас на гэтую справу таксама і сёння, каб мы, верныя сваёй харызме, неслі дух Назарэта ў кожнае сэрца і дом”, – адзначаюць сёстры назарэтанкі.
Святкуючы 150-гадовы юбілей, Кангрэгацыя сясцёр Найсвяцейшай Сям’і з Назарэта звяртаецца да вернікаў з заахвочваннем: “Сардэчна просім маліцца, каб гэты час стаў для нас сапраўдным часам навяртання і аднаўлення нашай любові да Бога, каб мы з большай адданасцю і жарам адкрывалі сэнс свайго прысвячэння і місіі служэння сям’і і настойліва шукалі новыя шляхі да рэалізацыі харызмы ў сучасным свеце. Запрашаем таксама разам з намі выказаць удзячнасць за ўсе дары і ласкі, якія былі ўдзелам Кангрэгацыі на працягу ўсіх гэтых гадоў, за дар паклікання нашых сясцёр, за іх жыццё і служэнне. Будзьма разам любіць Бога, які штодня выказвае нам міласэрнсць і хоча праз нас узбагачаць свет духам Назарэта”.
Малітва да Святой Сям’і
Найсвяцейшая Сям’я, блаславi i сцеражы ўсе сем’i свету. Захавай iх злучанымі ў непарыўным саюзе любовi, вернымі атрыманым ласкам i абавязкам свайго паклiкання. Учынi, каб яны жылi паводле запаведзяў Божых, каб iх жыцце было адлюстраваннем Твайго жыцця на зямлi i дазволiла iм некалі радавацца Тваiм шчасцем у небе. Амэн.
Прэс-служба Гродзенскай дыяцэзіі