3 лютага ў Каталіцкім Касцёле адзначаецца літургічны ўспамін св. Блажэя. Гэты святы вядомы найперш дзякуючы цікаваму абраду, які толькі раз у год адбываецца ў нашых святынях.

У гэты дзень кожны, хто наведвае святыню, можа прыняць удзел у абрадзе благаслаўлення спецыяльных свечак, якія называюцца “блажэйкамі”. Гэтыя васковыя свечкі пакладзены крыж-накрыж і звязаны ўнізе. Іх прыкладваюць да горла вернікам, якія просяць аб спецыяльным благаслаўленні.

Святар прамаўляе тады словы: „Праз заступніцтва святога Блажэя, біскупа і мучаніка, няхай Бог захавае цябе ад хваробы горла і ўсялякай іншай нядужасці. У імя Айца і Сына, і Духа Святога”.

Святы Блажэй жыў на рубяжы III i IV стст. у турэцкім горадзе Себасце. Ён быў урачом. Будучы заможным чалавекам, дапамагаў бедным, чым здабыў сімпатыю і ўдзячнасць жыхароў горада. Таму таксама пасля смерці мясцовага біскупа ён быў найлепшым кандыдатам для выканання гэтай функцыі.

Аднак яму не было дадзена здзяйсняць яе вельмі доўга. У той час пачаўся пераслед хрысціян Ліцыніем. Блажэй павінен быў хавацца. Ён пасяліўся ў скальнай пячоры, куды, паводле легенды, ежу прыносілі яму птушкі. Але хутка гэтае яго сховішча знайшлі, і ён быў арыштаваны.

На шляху ў вязніцу ён, акружаны салдатамі, не пераставаў навучаць і здзяйсняў цуды. Асабліва вядомым стала аздараўленне хлопца, у горла якому трапіла рыбная костка. Свайго паміраючага сына паклала да ног Блажэя адна жанчына, молячы аб аздараўленні хлопца. Блажэй паклаў на яго рукі, благаславіў, і той выздаравеў.

У вязніцы Блажэй перанёс жорсткія катаванні, бо не хацеў адрачыся ад сваёй веры. Паводле легенд, у хвіліну смерці ён маліўся і прасіў Бога, каб усе людзі з хваробамі горла або з іншай нядужасцю, якія будуць прасіць аб здароўі праз яго заступніцтва, былі выслуханы і аздароўлены. Голас з неба паведаміў яму, што тое, аб чым ён прасіў, будзе споўнена.

Святому Блажэю адсеклі галаву ў 316 г. Ён лічыцца апекуном тых, хто пакутуе ад розных хваробаў горла.