9 жніўня прыпадае ўспамін кармэлітанкі св. Тэрэзы Бэнэдыкты ад Крыжа (Эдыты Штайн), якая была забіта ў газавай камеры ў нацысцкім канцлагеры Асвенцым. Св. Тэрэза была першай габрэйкай, якая прыняла каталіцтва і была далучана да ліку святых. Ніжэй некалькі цікавых фактаў з біяграфіі мучаніцы.
- Эдыта Штайн нарадзілася ў 1891 годзе ў Вроцлаве і была малодшай з 11 дзяцей глыбока веруючай габрэйскай сям’і.
- У ранняй маладосці яна адышла ад юдаізму і да 30-гадовага ўзросту казала пра сябе, што з'яўляецца атэісткай, але працягвала шукаць праўды.
- Падчас Першай сусветнай вайны Эдыта далучылася да валанцёраў Чырвонага Крыжа і пачала працаваць у шпіталі з інфекцыйнымі хворымі.
- Пасля заканчэння вайны здабыла вучоную ступень доктара філасофіі.
- У 1921 годзе яна натрапіла на аўтабіяграфію містычкі св. Тэрэзы Авільскай, пасля чаго адкрыла для сябе Бога і Яго міласэрнасць. Праз пэўны час Эдыта прыняла хрост, запалам заахвоціўшы да гэтага і сваю сястру Розу.
- Ва ўзросце 42 гадоў Эдыта Штайн прыняла манаскія шлюбы і стала кармэліткай, узяўшы імя Тэрэза Бэнэдыкта ад Крыжа.
- Прыняцце хрысціянства не азначала для яе разрыву сувязяў з габрэйскім народам. Эдыта запэўнівала, што толькі цяпер, калі вярнулася да Бога, яна зноў адчула сябе габрэйкай. Св. Тэрэза мела свядомасць, што цяпер належыць Хрысту не толькі духоўна, але і праз кроўныя вузы.
- У перыяд пераследвання габрэўя нямецкімі фашыстамі св. Тэрэзу арыштавала гестапа і 7 жніўня 1942 года накіравала ў лагер смерці Асвенцым. 9 жніўня св. Тэрэзу Бэнэдыкту ад Крыжа забілі ў газавай камеры.
- У 1987 годзе Касцёл абвясціў яе мучаніцай і далучыў да ліку благаслаўлёных. Праз 11 гадоў Папа Ян Павел ІІ кананізаваў яе і абвясціў патронкай Еўропы.
- Гадавіна смерці св. Тэрэзы Бэнэдэкты ад Крыжа ў каталіцкім Касцёле прызнана днём малітвы за ахвяраў Халакосту.
"Бог з'яўляецца Праўдай. І хто шукае праўды, той шукае Бога, нават калі сам гэтага не ведае". (св. Тэрэза Бэнэдыкта ад Крыжа)
Падрыхтавала А. Марцішэўская