Заўтра 10 кастрычніка прыпадае 30-я гадавіна кананізацыі св. Максіміліяна Кольбэ. “Я павінен стаць святым, як мага большым”, - пакінуў запіс у сваім духоўным дзённіку ў 1921 годзе а. Максіміліян Кольбэ. 10 кастрычніка 1982 года Касцёл урачыста абвясціў, што сваім жыццём і ахвярнай смерцю гэты чалавек цалкам рэалізаваў сваю юнацкую пастанову. У Асвенціме з нагоды гадавіны адбылася св. Імша ў санктуарыі св. Максіміліяна. У польскім Непакалянаве, дзе св. Максіміліян заснаваў вялікую манаскую супольнасць, 14 кастрычніка адбудзецца малітоўная сустрэча падзякі за дар гэтага святога. А гродзенская супольнасць айцоў францішканаў рыхтуецца ад ўрачыстасцей з нагоды 90 год прыбыцця а. Максіміліяна Кольбэ ў Гродна, дзе ён пражыў 5 гадоў.
Па словах а. Юзафа Макарчыка OFMConv, пакуль канкрэтная дата ўрачыстасцей, а таксама іх дэталі ўдакладняюцца. Пра запланаваныя мерапрыемствы а. Юзаф паабяцаў пазней распавесці.
Нагадаем, мінулы год у Польшчы быў абвешчаны годам св. Максіміліяна Кольбэ, калі ў кастрычніку прыпадала 70-годдзе з дня яго пакутніцкай смерці. У Гродне з гэтай нагоды ў Музеі гісторыі рэлігіі адбылося адкрыццё выставы “Захаваўшы жыццё”.
Здымак Bogdan Migulski / flickr.com / CC BY 2.0