Вялікі пост яшчэ раз нагадвае пра тое, як мы патрэбны адзін аднаму і можам быць карыснымі для бліжніх.
За час дзейнасці Рэлігійнай місіі “Дабрачыннае каталіцкае таварыства «Карытас» Гродзенскай дыяцэзіі” рэалізавана каля паўсотні праектаў, якія скіраваны на вырашэнне сацыяльных праблем грамадскасці. Гэта адукацыйныя, інвестыцыйныя, гуманітарныя, антыкрызісныя, душпастырскія праекты. У іх ахоплены ўсе катэгорыі патрабуючых: састарэлыя людзі, дзеці, якія маюць праблемы са здароўем, моладзь, самотныя і бяздомныя, шматдзетныя, няпоўныя і малазабяспечаныя сем’і, мігранты.
Дзякуючы плённаму супрацоўніцтву з айчыннымі партнёрамі, замежнымі спонсарамі, валанцёрамі, “Карытас Гродна” рэалізуе важныя праекты, якія адпавядаюць выклікам часу. Адзін з апошніх такіх праектаў – гэта адкрыццё сацыяльнага пункту ў Іўі. Тут людзі, якія апынуліся ў цяжкай жыццёвай сітуацыі, могуць атрымаць гуманітарную дапамогу ў выглядзе прадуктаў харчавання, абутку, цёплага адзення, сродкаў асабістай гігіены. Абслугоўваюцца ўсе катэгорыі патрабуючых, незалежна ад іх полу, узросту і веравызнання.
Гэта другі такі падобны сацыяльны пункт, які функцыянуе на тэрыторыі Гродзенскай дыяцэзіі. Першы – ужо амаль 20 гадоў ажыццяўляе сваю дзейнасць у Гродне. Сюды штогод звяртаюцца каля 7-мі тысяч патрабуючых.
На працягу 25-ці гадоў “Карытас Гродна” рэалізуе праект па раздачы бясплатных гарачых абедаў у дабрачыннай сталовай, якая знаходзіцца па адрасе г. Гродна, вул. К. Маркса, д. 27. Штодня ў сталовую звяртаюцца каля 150 чалавек. Гэта бяздомныя і малазабяспечаныя людзі, асобы, якія вызваліліся з месцаў пазбаўлення волі, адзінокія пенсіянеры, інваліды, беспрацоўныя – усе тыя, хто апынуўся ў складанай жыццёвай сітуацыі. У сталовай у якасці кухараў і кухонных работнікаў служаць манахіні з Кангрэгацыі Найсвяцейшай Сям’і з Назарэта.
З верасня мінулага года дабрачынная сталовая “Карытас” працуе ў абноўленых і камфортных умовах. Была ўсталявана модульная канструкцыя з чатырох кантэйнераў, у якіх размешчаны абсталяваная кухня, памяшканне для захоўвання прадуктаў, а таксама прасторная сталовая, прыбіральні, душавы пакой і пральня. Варта падкрэсліць вялікую сацыяльную значнасць дадзенага праекта. Тут асобы з неабароненых слаёў насельніцтва могуць задаволіць свае базавыя патрэбы, адчуць сябе абароненымі людзьмі, аб якіх клапоцяцца і праяўляюць міласэрнасць, а таксама атрымаць увагу і падтрымку.
Клопат аб дзецях ажыццяўляецца праз наступныя праекты:
• “Канікулы з Богам” у дзіцячым каталіцкім лагеры “Нецяч”,
• “Добры пачатак жыцця. Матэрыяльная падтрымка сем’яў з нованароджанымі,
• Аказанне дапамогі дзецям-мігрантам,
• Акцыі “Падарунак на Раство” і “Школьны ранец”,
• “Інтэграцыя – дзеці – будучыня”.
Дапамога састарэлым, самотным, людзям з інваліднасцю, бяздомным людзям ажыццяўляецца праз праекты:
• “Мабільная дапамога”,
• “Зімовая дапамога”,
• Сталовая “Карытас” для бедных,
• Сацыяльны пункт “Карытас”,
• “Бяспечнае і здаровае асяроддзе для пажылых і найбольш уразлівых ў Беларусі”,
• Дапамога былым вязням.
Апошнія 5 гадоў актыўна вядзецца будаўніцтва сацыяльна важнага аб’екта для ўсёй дыяцэзіі – Дома для прыбывання састарэлых людзей у Сапоцкіне (Гродзенскі р-н).
Парафіяльныя “Карытас” на тэрыторыі Гродзенскай дыяцэзіі таксама развіваюцца. Амаль 20 парафій займаюцца актыўным сацыяльным служэннем для мясцовых супольнасцей.
Неабходна адзначыць, што кожны год пашыраюцца межы ўзаемадзеяння з рэгіянальнымі сацыяльнымі цэнтрамі, падрымліваецца супрацоўніцтва з дзяржаўнымі ўстановамі адукацыі і ўстановамі аховы здароўя.
Падтрымаем агульнымі малітвамі ўсе тыя справы і ініцыятывы, якія рэалізуе “Карытас” Гродзенскай дыяцэзіі, каб з Божай дапамогай усё ўдалося. Разам мы можам зрабіць вельмі шмат!
Каб асабіста прыняць удзел у дабрачыннасці, можна пералічыць сваё ахвяраванне на рахунак “Карытас Гродна”: ЕРИП – Благотворительность, общественные объединения – Религиозные объединения – Каритас Гродненской епархии – Пожертвование.
Супрацоўнікі і валанцёры Рэлігійнай місіі “Дабрачыннае каталіцкае таварыства «Карытас» Гродзенскай дыяцэзіі” складаюць падзяку ўсім вернікам, якія ўжо прынялі або збіраюцца прыняць удзел у дабрачыннасці, якая будзе скіравана на карысць патрабуючых.
Дырэктар “ДКТ Карытас”
Гродзенскай дыяцэзіі
кс. Раман Рачко