Найбольш частым пытаннем пры звароце да псіхолага, асабліва ў перыяд эканамічнага крызісу, з'яўляецца пытанне: "Я застаўся без працы. Што рабіць? Дапамажыце мне, калі ласка". Сапраўды, што ж рабіць у падобнай сітуацыі?
Па-першае, звярнуць увагу на выказванне Д. Кэнэдзі аб тым, што слова "крызіс", напісанае па-кітайску, складаецца з двух іерогліфаў: адзін азначае "небяспека", другі - "спрыяльная магчымасць".
Па-другое, прыслухацца да сябе, бо па словам Р. Баха, "Кожнае жаданне даецца разам з сіламі для яго ажыццяўлення".
Па-трэцяе, паспрабаваць прама цяпер, чытаючы гэтыя радкі, адказаць на пытанне: "Якія новыя магчымасці для мяне адкрывае гэтае, не вельмі прыемнае, становішча?"
Так, для аднаго - гэта шанец адпачыць, для іншага - прысвяціць больш часу сабе, мужу, дзецям, бацькам, дому, рамонту памяшкання, дачы і г.д., для трэцяга - здольнасць рэалізаваць сябе на новым месцы, у новай якасці, а, магчыма, і ў новай прафесіі.
Затым паспрабаваць атрымаць адказ на пытанне: "Якія рэсурсы (веды, уменні, навыкі або сябры, сваякі, знаёмыя) у мяне ёсць? І якім чынам я магу гэта выкарыстаць?" Верагодней за ўсё раней у вас проста не было вольнага часу і адвагі для таго, каб нешта змяніць у сваім жыцці!
Зараз жа з'явіўся шанец. Скарыстайцеся ж з яго!
Для гэтага задайце сабе яшчэ адно пытанне: "Што я гатовы зрабіць для таго, каб знайсці рашэнне? Якім чынам я магу змяніць цяперашняе становішча?"
Патэлефанаваць па аб'яве? Звярнуцца да даўняга знаёмага? Змяніць прафесію? Пайсці вучыцца? І, калі вы зразумееце, чаго менавіта хочаце, то, як сказаў філосаф Д. Рон, "Шукайце спосаб дасягнуць гэтага. А тое, у што мы верым, становіцца нашай рэальнасцю". Выбар за вамі. Поспехаў вам!
Аўтар: Кісялеўская Святлана, псіхолаг