Ці існуе штосьці такое, як Божы план для кожнага асобнага чалавека? Чым ён з’яўляецца і як яго разумець?
Адказвае кс. Эрнэст Мікалайчык
"Благаслаўлёны Бог і Айцец Пана нашага Езуса Хрыста, які благаславіў нас у Хрысце ўсялякім духоўным благаслаўленнем на нябёсах і выбраў нас у Ім перад стварэннем свету, каб мы былі святымі і беззаганнымі перад Ім у любові. Ён прадвызначыў нас для ўсынаўлення праз Езуса Хрыста, паводле ўпадабання сваёй волі, дзеля хвалы сваёй праслаўленай ласкі, якою Ён адарыў нас ва Умілаваным” (Эф 1, 3–6).
Словы Святога Пісання падкрэсліваюць, што для кожнага чалавека Бог падрыхтаваў асабісты план збаўлення. Кожны чалавек не выпадковы, ён не выпадкова нарадзіўся ў той ці іншай сям’і, месцы, асяроддзі. У першую чаргу, ён пакліканы да збаўлення. Таксама кожны мае асабістыя пакліканні, індывідуальны жыццёвы шлях, крочачы якім дойдзе да збаўлення.
Бог шануе нашу вольную волю, таму не змушае, а толькі заклікае да прыняцця Яго намераў паводле жыцця канкрэтнай асобы. Заданне кожнага ў тым, каб распазнаваць і старанна выконваць Божую волю, супрацоўнічаць з ласкай Пана. Гледзячы на ўласныя таленты і здольнасці, разважаючы падчас асабістай малітвы, чалавек можа паволі распазнаць Божы план паводле сябе і асабіста вырашыць, прымаць запрашэнне Усемагутнага ці не.
З павагай, кс. Эрнэст