Што можна рабіць са святой вадой?

Адказвае кс. Аляксандр Стока

Паводле каталіцкай традыцыі, святая вада належыць да сакрамэнталіяў. Чым з’яўляюцца сакрамэнталіі? Як кажа нам ККК, гэта прадметы або дзеянні, якія дзякуючы малітве Касцёла ўказваюць на духоўныя даброты і асвячаюць штодзённае жыццё веруючага чалавека, рыхтуючы яго да больш глыбокага прыняцця і перажыцця канкрэтнага сакрамэнту.

Святая вада, благаслаўлёная біскупам, прэзбітэрам або дыяканам, – традыцыя, якая існуе ў гісторыі хрысціянства з ІІ стагоддзя.

У Старым Запавеце святая вада мае ачышчальную моц. У Новым Запавеце яна мае асвячальную моц, звязаную з хростам Езуса ў водах Ярдана.

У Святы Пасхальны Трыдуум, а дакладней у Вялікую суботу, благаслаўляецца вада для хросту, і вернікі могуць узяць яе дадому і карыстацца ёю, робячы знак крыжа, змачыўшы ў ёй пальцы, а таксама спажываць яе на працягу дня, перад гэтым зрабіўшы знак крыжа.

Акрамя таго, вернік можа на працягу ўсяго года папрасіць святара благаславіць ваду для ўласнага карыстання дома.

У нашых каталіцкіх святынях такая вада стаіць перад уваходам у касцёл у спецыяльных крапільніцах, каб, уваходзячы, кожны мог зрабіць знак крыжа, змачыўшы ў ёй пальцы. Гэта сімвал уласнага хросту, які мы атрымалі ад Бога.

Святая вада выкарыстоўваецца для сакрамэнту хросту, благаслаўлення страваў на велікодны стол і аплатак на вігілійны стол, благаслаўлення кадзіла і крэйды ў свята Аб’яўлення Пана, благаслаўлення пальмовых галінак, зёлак у свята Маці Божай Зельнай і грамнічных свечак у свята Маці Божай Грамнічнай, благаслаўлення абразоў, рэлігійных прадметаў, а таксама падчас шлюбу, для благаслаўлення пярсцёнкаў. Яна выкарыстоўваецца падчас экзарцызмаў і благаслаўлення памяшканняў у доме або іншых месцах. Такім чынам, мы бачым, як шануецца святая вада ў нашым штодзённым рэлігійным жыцці.

Калі вада доўга стаіць, яна можа атрымаць непажаданы асадак або сапсавацца і мець непрыемны пах. Такую святую ваду трэба выліць у годнае месца – гэта можа быць агарод або вазон з кветкамі. Нельга выліваць яе ў ракавіну. Да кожнай благаслаўлёнай рэчы павінна быць павага.

З пашанай, кс. Аляксандр.