Як растлумачыць няверуючаму чалавеку, чаму падтрымліваю пост у пятніцу і хаджу ў нядзелю ў касцёл? Якія аргументы магу прывесці? Юлія
Адказвае а. Аляксандр Махнач SP
Размова з няверуючым чалавекам заўсёды нялёгкая, таму што закранае розныя пытанні адносна веры ў Бога. Не з’яўляецца выключэннем і Вашае пытанне. З чалавекам, які пазіцыянуе сябе як няверуючы (атэіст ці агностык), трэба найперш размаўляць пра існаванне Бога, пра мой вобраз Бога і пра ўласны досвед веры ў Яго. Няма сэнсу найперш разважаць пра нейкія справы, звязаныя з дысцыплінай Касцёла, таму што няверуючаму гэта будзе незразумела. Чаму? Бо ён не верыць у Бога, а значыць, усё іншае, звязанае з рэлігіяй, не мае сэнсу.
Ужо наступным крокам будзе размова пра хрысціянскі лад жыцця (малітва, святая Імша, пост і г.д). Канешне, прыклад веры прыцягвае, і чалавек пачынае цікавіцца. Калі няверуючая асоба гатовая слухаць аргументы другога боку, то гэта ўжо вельмі добра. Найперш падчас размовы трэба распавесці ўласнае сведчанне пра сустрэчу з Богам і як Ён дзейнічае ў маім жыцці – бо гэта самы важкі аргумент! Нават тэалагічныя кнігі не ўзбудзяць веру, бо яны даюць веды, а не веру! Вера – гэта маé асабістыя адносіны з Богам! Чаму я веру і люблю Бога? Чаму я выбіраю Яго штодня ў маім жыцці? Чаму гэта вельмі важна для мяне асабіста? Бо менавіта з гэтага вынікае маё жаданне захоўваць пост у пятніцу – дзень смерці Хрыста – і прысутнічаць на нядзельнай Эўхарыстыі, бо гэта сустрэча з Уваскрослым!
У гэтай сітуацыі не трэба вялікіх багаслоўскіх аргументаў. Тут усё вельмі асабіста. Спрабаваць размаўляць трэба заўсёды – бо гэта магчымасць абвяшчаць Евангелле! Адвагі! Абяцаю малітву ў гэтай справе.
Беражы Вас Бог!