Папяльцовая серада распачынае перыяд Вялікага посту. Гэта роўна 40 дзён (не лічачы нядзель), калі Касцёл асаблівым чынам заахвочвае вернікаў да малітвы, посту і ўчынкаў міласэрнасці.
Папяльцовая серада сёлета прыпадае на 5 сакавіка. Урачыстасць Уваскрасення Пана – 20 красавіка.
Што такое Папяльцовая серада?
Папяльцовая серада яшчэ па-простаму называецца Папялец. Назва гэтага дня паходзіць ад абраду пасыпання галоў попелам, які сімвалізуе перамяненне, пакаянне і навяртанне. Святары прамаўляюць над вернікамі словы: “Ты – прах і ў прах вернешся” або “Навяртайцеся і верце ў Евангелле”. Гэта нагадвае пра хуткаплыннасць чалавечага жыцця і заахвочвае да разважання над сваімі паводзінамі.
Якое значэнне мае Вялікі пост?
Вялікі пост – час духоўнай падрыхтоўкі да свят Уваскрасення Пана. Яго мэта – навярнуць сэрца, паразважаць над сэнсам жыцця і паглыбіць адносіны з Богам.
Традыцыйна гэты перыяд звязаны з адмаўленнямі – такімі, як дабравольнае абмежаванне ў прыемных рэчах.
Чаму Вялікі пост працягваецца 40 дзён?
Сімволіка лічбы 40 глыбока ўкаранёна ў хрысціянскай традыцыі. Яна нагадвае пра 40 дзён посту Езуса ў пустыні, якія былі часам падрыхтоўкі да публічнай місіі. Гэта спасылка на 40 гадоў вандроўкі ізраільцян па пустыні ў дарозе да Абяцанай зямлі, а таксама на колькасць дзён, якія Нініва атрымала на пакаянне ў біблейскай Кнізе Ёны.
Як добра перажыць Вялікі пост?
Каб правесці ў паўнаце такі святы час, варта прыняць канкрэтныя пастановы, якія дапамогуць у духоўным узрастанні. Зрабіць гэта можна некалькімі спосабамі:
Малітва – прысвячэнне больш часу на размову з Богам;
Пост – свядомае адмаўленне ад рэчаў, якія адцягваюць ад духоўных спраў;
Міласціна – дапамога тым, хто знаходзіцца ў патрэбе (напрыклад, фінансава ці праз удзел у дабрачыннай дзейнасці).
Варта таксама ўзяць удзел у набажэнствах Песень жальбы і Крыжовага шляху.
Як выглядае Папяльцовая серада?
Папяльцовая серада – незвычайна важная для католікаў падзея. У гэты дзень у касцёлах адбываюцца літургіі, на якіх вернікі прымаюць удзел у абрадзе пасыпання галоў попелам. Цікава, што попел, які выкарыстоўваецца ў гэтай цырымоніі, паходзіць ад спаленых велікодных пальмовых галін мінулага года (бласлаўляюцца ў Пальмовую нядзелю – апошнюю нядзелю Вялікага посту).
У Папяльцовую сераду абавязковы таксама сціслы пост (і ў якасці ежы, і ў колькасці). Вернікі абавязаны абмежаваць колькасць пасілкаў да трох (з іх адзін дасыта), а таксама адмовіцца ад мясных страў.
У Папяльцовую сераду няма абавязку ўдзельнічаць у св. Імшы, аднак варта знайсці час, каб з пасыпання галавы попелам распачаць гэты святы перыяд. Ён можа стаць шансам унутранага перамянення і знаходжання глыбейшага сэнсу штодзённасці.
Паводле “Слова Жыцця”, кс. Юрый Марціновіч