Кожны чалавек, які жыве на зямлі, мае сваё падарожжа жыцця і павінен добра падрыхтаваць свой багаж, каб ён быў карысным і не ўтрымліваў непатрэбнага цяжару.
Вялікі пост – асаблівы этап гэтага падарожжа, на якім мы вучымся змагацца са спакусамі, што ўскладняюць наша пілігрымаванне.
Нас штодзённа спакушае сатана, які спрабуе пераканаць нас, што тое, што ён прапануе, дасць нам шчасце. Езус Хрыстус сваім досведам у пустыні паказаў нам правільны шлях: адкінуць спакусы матэрыялізму, улады і пыхі і даверыцца толькі Богу.
Збаўца паказвае нам, што сапраўдная свабода паходзіць з імкнення за Божымі ўказаннямі, а не з пошуку выгодаў ці прытрымлівання таго, што нашэптвае гэты свет.
Няхай сёлетні Вялікі пост у Юбілейным 2025 годзе будзе для нас шансам падрыхтаваць наш “багаж жыцця” прадумана, засноўваючыся на каштоўнасцях, якія сапраўды вядуць да Бога.
Добра задумаемся ўжо цяпер, што пакінуць, а што ўзяць і на чым заснаваць свой штодзённы выбар, каб наша падарожжа вяло да паўнаты жыцця і шчаслівай вечнасці з Богам.
Кс. Юрый Марціновіч