Пятніцу першага тыдня Вялікага посту, 23 лютага, Папа Францішак абвясціў асаблівым днём посту і малітвы за мір. Гэты дзень пройдзе найперш у інтэнцыі народаў Дэмакратычнай Рэспублікі Конга і Паўднёвага Судана.

Святы Айцец таксама заклікаў далучыцца да гэтай ініцыятывы “некатолікаў”, “нехрысціян” і ўсіх людзей добрай волі.

“Наш Нябесны Айцец заўсёды слухае сваіх дзяцей, якія звяртаюцца да Яго ў болі і смутку. Ён аздараўляе скрушаных сэрцам і раны завязвае ім” (Пс 147, 3).

Звяртаюся з сардэчным заклікам, каб таксама і мы пачулі гэты крык, і кожны з нас у сваім сумленні, перад Богам, задаў сабе пытанне: “Што я магу зрабіць для  міру?”  Безумоўна, мы можам маліцца; але не толькі: кожны можа канкрэтна сказаць “не” гвалту, наколькі гэта залежыць ад яго. Таму што перамогі, атрыманыя ў выніку насілля – гэта фальшывыя перамогі. Затое праца на карысць міру стварае дабро для ўсіх”, – адзначыў Папа, абвяшчаючы гэты дзень.

JM