Skip to main content
sapka

Зварот біскупа Аляксандра Кашкевіча да духавенства і вернікаў Гродзенскай дыяцэзіі ў сувязі з рашэннем папы Бэнэдыкта XVI аб сыходзе з пасады Наступніка святога Пятра

11 лютага 2013 г. на звычайным кансісторыі (скліканні) Яго Святасць Папа Бенедыкт XVI паведаміў грамадству аб прынятым рашэнні сыходу з пасады Біскупа Рыма, Наступніка Святога Пятра, які адбудзецца 28 лютага а 20-й гадзіне. Святы Айцец падкрэсліў у сваёй дэкларацыі, што ён у поўнай свядомасці сур’ёзнасці гэтага акту і ў свабодзе па папярэднім роздуме згодна з сумленнем з прычыны сталага ўзросту і фізічных сіл, якія не дазваляюць яму належным чынам ажыццяўляць абавязкі, прыняў рашэнне аб сыходзе з пасады Святога Пятра.

Як вернікі Каталіцкага Касцёла, паспрабуем ў пакоры і поўнай пашане знайсці разуменне ў гэтым рашэнні Святога Айца, якое з’яўляецца выражэннем аўтэнтычнага клопату дзеля карысці Касцёла і пастарскай адказнасці за яго будучыню.

Падзякуем Божаму Провіду за дар пантыфіката Бенедыкта XVI Паўсюднаму Касцёлу і ўсяму сучаснаму свету. Падзякуем Святому Айцу за яго ахвярную паслугу Касцёлу, за яго навучанне, а таксама за асабістае сведчанне глыбокай веры і бацькоўскі клопат аб кожным чалавеку.

Няхай Вашая шчырая ўдзячнасць Рымскаму Папу Бенедыкту XVI за яго пастарскую паслугу на Апостальскім Пасадзе будзе выражана ў палкай малітве за яго, каб Добры Бог адарыў яго моцным здароўем і ўсімі неабходнымі ласкамі. Няхай благаславіць яму на далейшае вернае служэнне Хрыстоваму Касцёлу.

Аляксандр Кашкевіч
Гродзенскі Біскуп
Рэдагавана: 05 Лютага 2017