Умілаваныя Вернікі Гродзенскай дыяцэзіі!

  З вялікай радасцю мы прынялі навіну пра тое, што Святы Айцец Бенедыкт XVI пацвердзіў гераічнасць цнот Слугі Божага Яна Паўла II. Быў таксама прызнаны цуд, здзейснены праз заступніцтва Слугі Божага . Слугу Божага Яна Паўла II ужо пры жыцці лічылі святым, а зараз ён тым больш будзе нашым абаронцам у небе.

 

  Урачыстасць беатыфікацыі Яна Паўла II адбудзецца ў Нядзелю Божай Міласэрнасці, 1 траўня, на плошчы св. Пятра ў Рыме. Пра магчымасць і ўмовы ўдзелу ў ёй пытайцеся сваіх ксяндзоў-пробашчаў.

  Дзякую ўсім тым, хто маліўся за вынясенне на алтары Вялікага Папы. Запрашаю ўсіх да духоўнай падрыхтоўкі да беатыфікацыі Святога Айца Яна Паўла II, які быў такі дарагі і святарам, і вернікам нашай дыяцэзіі і ўсёй Беларусі. Давайце перажываць гэты час на ўдзячнай малітве, просячы аб багатых Божых ласках для нашай дыяцэзіі, Касцёла ў Беларусі і ва ўсім свеце.

 

   На час чакання беатыфікацыі і падрыхтоўкі

   з усяго сэрца ўсіх бласлаўляю

Аляксандр Кашкевіч,
Біскуп Гродзенскі