Яго Эксцэленцыя кс. біскуп Аляксандр Кашкевіч скіраваў да паважаных кс. пробашчаў і адміністратараў Гродзенскай дыяцэзіі паведамленне Святога Айца аб Сусветным місійным дню (20.10.2013 г.)
20 кастрычніка, у перадапошнюю нядзелю гэтага месяца, у каталіцкім Касцёле традыцыйна перажываецца Сусветны місійны дзень. У сувязі з гэтым, у нядзелю, якая папярэднічае Місійнаму дню (13 кастрычніка), прашу заахвоціць вернікаў да малітвы ў інтэнцыі місіянераў і за каталіцкія місіі. Належыць таксама 20 кастрычніка сабраць нядзельныя ахвяраванні на патрэбы каталіцкіх місій і перадаць іх у дыяцэзіяльную курыю.
Наша дапамога місіянерам і місіям у місійных краінах выражаецца праз салідарнасць у малітве і матэрыяльную дапамогу. Падчас Сусветнага дня місій і Місійнага тыдня (20 – 27.10.2013 г.) можна разам з вернікамі разважаць змест паслання папы Францішка, а таксама неабходна маліцца ў асобных місійных інтэнцыях.
У пасланні на Сусветны місійны дзень Святы Айцец у чарговы раз прыгадаў аб тым, што Касцёл “гэта не арганізацыя дапамогі, прадпрыемства або няўрадавая арганізацыя, а супольнасць асоб, ажыўляемых дзейнасцю Святога Духа”, а таксама аб тым, што “місійная дзейнасць з’яўляецца заданнем кожнага ахрышчанага, а місійнасць – гэта важная рыса хрысціянскага жыцця”.
Прымаючы гэтыя важныя ўказанні Святога Айца Францішка, давайце разам маліцца аб абуджэнні місійнага духу ў нашых парафіях, а сваёй актыўнай падтрымкай справы евангелізацыі маладых Касцёлаў – клапаціцца аб збаўленні ўсяго свету ў Хрысце.
На перажыванне Сусветнага місійнага дня разам з вернікамі нашай дыяцэзіі ад усяго сэрца бласлаўляю
Аляксандр Кашкевіч
Біскуп Гродзенскі
Гродна, 03.10.2013
Малітва бл. Яна Паўла ІІ аб місійным духу
Пане Езу, які некалі заклікаў першых вучняў, каб сталі рыбакамі людзей, няхай таксама і сёння гучыць Твой лагодны заклік: “Ідзі за мной!”. Удзялі хлопцам і дзяўчатам гэтую ласку, каб яны радасна адказалі на Твой голас!
Падтрымлівай у апостальскай працы нашых біскупаў, святароў і кансэкраваных асоб. Адары стойкасцю семінарыстаў і ўсіх, хто рэалізуе свой жыццёвы ідэал у поўнай адданасці Тваёй службе. Абудзі ў нашых супольнасцях місійны запал. Накіруй, о Пане, работнікаў на сваё жніво і не дазволь, каб недахоп пастыраў, місіянераў і тых, хто прысвячае жыццё справе Евангелля, прывёў чалавецтва да пагібелі. Амэн.
Малітва за місіі і місіянераў
Пане, абудзі ў кожным, хто належыць да Твайго Касцёла, сапраўдны місіянерскі запал, каб абвяшчаць Хрыста тым, хто Яго яшчэ не пазнаў, і тым, хто перастаў верыць.
Учыні так, каб было шмат пакліканняў, і падтрымлівай сваёй ласкай місіянераў у справе евангелізацыі. Дазволь, каб кожны з нас адчуў сябе адказным за місіі, а ў першую чаргу зразумеў, што нашым першапачатковым абавязкам у пашырэнні веры з’яўляецца сапраўднае хрысціянскае жыццё. Амэн.