Абцёр-сюр-Дрон з'яўляецца адной з самых прыгожых вёсак Францыі, знаходзіцца на схіле пагорка, з усіх бакоў акружанага дрэвамі. Дамы пакрытыя цёмна-чырвонай дахоўкай, а фасады ўпрыгожаны драўлянымі балконамі...

Наяўнасць замка і некалькіх манастыроў кажа нам пра багатае гістарычнае мінулае вёскі, але галоўны

cкарб знаходзіцца ў самым цэнтры Абцёра. Гэта ўнікальнае месца з несумненнай энергетыкай.

Касцёл святога Яна Хрысціцеля (Saint-Jean-Baptiste) з'яўляецца не проста падземным. Ён маналітны, што ў перакладзе з грэцкага "monos lithоs" азначае "з адзінага камня".

У XII стагоддзі ён быў высечаны бенедзікцінскімі манахамі ў вапняковых гарах. Доўгі час заставаўся невядомым, пакуль яго зноў не адкрылі шырокай публіцы ў 1950-ых. Калі вы ўвойдзеце ўнутр, вас перш за ўсё ўразіць прахалода і адсутнасць святла. Становіцца зразумелым, што манахі-будаўнікі выкарысталі ўжо існуючыя пячоры, якія яны пашырылі і перарабілі ў месца для малітвы. Унутраныя памеры касцёла ўражваюць: 27 м у даўжыню, 16 у шырыню і каля 20 м у вышыню.

Як і ў любым касцёле, у ім ёсць апсіда, неф, застаўлены больш за 80 саркафагамі, а таксама галерэя, якая была высечана на 15 м пад узроўнем зямлі.

Трапіць у галерэю можна па лесвіцы, таксама высечанай у скале. Калісьці па гэтай галерэі можна было дабрацца да замка, размешчанага непадалёк.

У касцёле ёсць яшчэ баптыстэрый, датаваны V стагоддзем, і крыпта, якая была знойдзена цалкам выпадкова.

Інфармацыя:

Дзе: рэгіён Пуату-Шаранта, 499 км ад Парыжа, 48 км на поўдзень ад Ангулема, Aubeterre-sur-Dronne, rue Saint-Jean.

Калі: круглы год у 9.30-12.30 і 14.00-18.00 (з чэрвеня па верасень да 19.00).

Колькі: 5 (2) еўра, брашура/аўдыягід - 1 еўра.

Лепшы час для візіту: ліпень і жнівень, калі ў храме праходзяць канцэрты ў рамках фестывалю Музычных начэй.

Крыніца: france-guide.livejournal.com